2Sa 19 | ZomZIV | STEP | Joab kiangah, “Kumpipa in Absalom kahkahin a thum-thum hi,” ci-in a kiko hi.

2 Samuel 19

1 Joab kiangah, “Kumpipa in Absalom kahkahin a thum-thum hi,” ci-in a kiko hi. 2 Tua hi-a, tua ni-in, “A tapa hangin kumpipa dah hi,” cih galkap honpi in za uh ahi manin galkap buppi adingin tua ni-a gualzawhna, thumna a suak hi. 3 Galsimna pana tai-te maizumin a dap lut bangin tua ni-in mipite khuapi sungah a daplut uh hi. 4 Kumpipa in a mai khuh in, “O ka tapa Absalom! O Absalom ka tapa, ka tapa!” ci-in nakpi in a kap hi.

5 Tua ciangin inn sungah Joab lut a kumpipa kiangah, “Nangma nuntakna, na tanu na tapate nuntakna le na zipite le na zinote nuntakna a hukhia na mite khempeuh tuni-in na maizumsak hi. 6 Nang hong mudahte na it a, nang hong itte na mudah hi. Tuni-in galkap mangte le a mite bangmah man lo na suahsak lam kitel hi. Tuni in Absalom-te nungta henla, kote khempeuh si khin le ung na nuam ding lamtak ka thei hi. 7 Tu-in paikhia inla na mite hanthawn in. TOPA lo in ka kiciam hi, na paikhiat kei leh tuzan ciangin mi khat beek in nang hong ompih lo ding hi. Hih in nang adingin na neu tunga kipan tuhun donga tuahsiatna sangin nasiazaw ding hi,” a ci hi. ^a

8 Tua ciangin kumpipa ding to a, kongpi-a a tutna ah a tu hi. Mite kiangah, “Kongpi ah kumpipa tu hi,” ci-a a kigen ciangin amaute khempeuh a mai-ah a pai uh hi. ^b

Jerusalem ah David Ciahkik

Tua hun laitakin Israel-te a inn uah a tai uh hi. 9 Israel beh sung tengah, “Kumpipa in i galte khut panin hong hukhia hi; Philistia-te khut pana hong hukhia zong amah ahi hi. Ahi hangin Absalom hangin a gam taisan hi; 10 tuateh eite hong uk dingin sathau i nilhpa Absalom lah gal sungah si ta hi. Tua ahi ciangin bang hanga kumpipa lak kik ding a gen om lo na hi uh hiam?” ci-in mi khempeuh khat le khat a kingawh uh hi.

11 Tua ciangin David in siampi Zadok le Abiathar-te kiangah, “Judah upate kiangah, ‘Israel sungteng khempeuh ah kumpipa ama muna omsak kik ding a kigen nungsang bang hangin kumpipa a kumpi inn ah tunpih kik ding, note a nunung pen hi ding na hi uh hiam? 12 Note ka sanggamte, keima si-le-sa na hi uh hi. Tua ahi ciangin bang hangin kumpipa a tun kik nunung pen hi ding na hi uh hiam?” ci-in a dongsak hi. 13 Tua ciangin Amasa kiangah, ‘Nang ka si-le-sa hi lo na hi hiam? Tu-a kipan mailam ah ka galkap mangpa dingin Joab munah kong koih kei tak leh Pasian in a ut bangin hong bawlin a nasiazaw-in zong hong bawl ta hen, ci hi’ ci un,” ci-in thu a zasak hi. ^c

14 David in Judah mi khempeuh lungsim mi khata bangin a zo pah hi. Amaute in kumpipa kiangah, “Nang le na mite khempeuh hong ciah un,” ci-in thu a zasak uh hi. 15 Tua ciangin Jordan dong kumpipa a ciah kik hi.

Tu-in kumpipa dawn ding le Jordan gal a kahpih dingin Judah mite kuankhia-in Gilgal a tung uh hi. 16 Bahurim pana Benjamin-te Gera’ tapa Shimei, Judah mite tawh kumpipa David dawn dingin manlangin a kuankhia hi. 17 Amah tawh Benjamin-te tul khat hi a, Saul innsung neihsa kempa Ziba tonpihin, a tapa sawm le nga le a nasemte sawmnih tawh ahi uh hi. Amaute, kumpipa omna Jordan ah a taisuk henhan uh hi. 18 Kumpipa innkuante a galkahpih ding le ama deih bangbang a sem dingin ngahmun ah a galkah uh hi. ^d

Jordan galah Gera’ tapa Shimei a galkah khit ciangin kumpipa mai ah khup bawh a 19 a kiangah, “Ka topa in kei hong mawhsak kei in. Ka topa kumpipa in Jerusalem na nusiat ni-a na nasempa gamtatna ciamteh kei in. Kumpipa in na lungsim ah koih kei in. 20 Ahang in, na nasempa keimah ka mawh lam ka thei hi; ahi hangin tuni-in ka topa kumpipa dawn dingin Joseph innkuan buppi panin kei hih lai kong tungsuk masa pen hi,” a ci hi. ^e

21 Tua ciangin Zeruiah’ tapa Abishai in, “Hih thu hangin Shimei thah ding hi lo hiam? Amah in TOPA sathau nilhpa a hamsiat hi,” a ci hi. ^f

22 David in, “Zeruiah’ tapa aw, nang tawh bang kisai i hi hiam? Tuni-in ka langpangte na suak khin uh hi. Tuni-in Israel khatpeuh kithat ding ahi hiam? Tuni-in Israel kumpipa ka hilam a thei lo hong sa na hi uh hiam?” ci-in a dawng hi. 23 Tua ciangin kumpipa in Shimei kiangah, “Na si peuhmah kei ding hi,” a ci hi. Tuateh ama tungah kumpipa a kiciam hi.

24 Saul’ tupa, Mephibosheth zong kumpipa dawn dingin a paisuk hi. Amah in kumpipa a paikhiata kipan galmuanga a tun kik ni dong a khete zun lo-a, a mukmul lah kiat loin a puansilh zong a sawp kei hi. 25 Kumpipa dawn dingin Jerusalem pan a kuankhiat ciangin kumpipa in, “Bang dinga kei hong zui lo na hia Mephibosheth?” ci-in a dong hi.

26 Amah in, “Ka topa kumpipa aw, ka khe bai-a, ‘Kumpipa ka zui ding hi, ka tuan nading laa tutphah hong vawhsak in,’ ka ci hi. Ahi hangin ka nasempa Ziba in kei hong khem hi. 27 Amah in ka topa kumpipa kiangah na nasempa hong siatgen ahi hi. Ka topa kumpipa vansawltak khat tawh na kibang hi; tua ahi ciangin na lungkim bangbangin hong hih in. 28 Ka topa kumpipa tungah ka pu’ suante khempeuh thahlup ding vive hi napi nang in na nasempa na sabuai-a tute lakah mun nong pia hi. Tua ahi ciangin kumpipa tungah bang hamphatna ngenthuah lai ding ka hi hiam?” a ci hi. ^g

29 Kumpipa in, “Bang gen lailai na hi hiam? Nang le Ziba in lote na hawm dingun thu ka pia hi,” a ci hi.

30 Mephibosheth in kumpipa kiangah, “Na khempeuh amah lasak in, tu-in ka topa kumpipa nuamtakin inn nong tung kik hi,” a ci hi.

31 Gilead-te Barzillai zong kumpipa Jordan gun a kantanpih ding le tua lai panin amah a kha dingin Rogelim panin a kuansuk hi. 32 Tua hunin Barzillai khangham mahmah ta a, kum sawmgiat a pha hi. Amah mi nuamsa ahi manin Mahanaim ah kumpipa a om lai-in a vak hi. 33 Kumpipa in Barzillai kiangah, “Kei tawh galkah khawm in; Jerusalem ah tengkhawm ni, nang kong vak ding hi,” a ci hi.

34 Ahi hangin Barzillai in kumpipa kiangah, “Kumpipa tawh Jerusalem a tonto dingin kum bangzah zong nungta nawn ding ka hi hiam? 35 Kum sawmgiat ka pha ta hi. Bang hoih a, bang hoih lo hiam cih zong gen thei nawn ka hi hiam? Na nasempa in a nek a dawnte a limna zong thei nawn ahi hiam? Numei le pasalte lasak zong za thei nawn se ka hiam? Bang hangin na nasempa in kumpipa ading vangik hong suanbeh ding ka hi hiam? 36 Na nasempa in Jordan gal tomkha kong zui lai ding hi; ahi hangin kumpipa in tua banga pahtakman hong pia laizang ding na hi hiam? 37 Na nasempa ka tenna khua ah, si-a ka nu ka pa han gei-ah kivui theih nadingin hong ciahsak zaw in. Ahi zongin na nasempa Kimham hih lai-ah om hi. Ka topa kumpipa tawh na galkah khawm un. Ama tungah na lungkim bangin na hih in,” a ci hi.

38 Kumpipa in, “Kimham tawh ka galkah khawm dinga na lungkim bangin ama tungah ka na hih ding hi. Tuateh kei hih dinga na deih khatpeuh kong hihsak ding hi,” a ci hi.

39 Tua ciangin mite khempeuh Jordan gal kah uh a, tua khit ciangin kumpipa a galkah pan hi. Kumpipa in Barzillai namin ama thupha pia a, Barzillai a inn ah a ciah hi. ^h

40 Gilgal ah kumpipa a galkah ciangin amah tawh Kimham a galkah khawm hi. Judah galkap khempeuh le Israel galkap a langin kumpipa a kha uh hi.

41 Israel mite khempeuh kumpipa kiangah paipah uh a, ama kiangah, “Bang hangin i sanggam Judah mite in kumpipa gumangin amah le a innkuanpihte Jordan kantanin a mite khempeuh tawh hong puak ahi uh hiam?” a ci uh hi. ⁱ

42 Judah mite khempeuh in Israel-te kiangah, “Ko le kumpipa kitanau zaw ka hi manun ka hih uh ahi hi. Bang hangin hih thu ah heh na hi uh hiam? Kumpipa’ tanh ko nekha ka hi uh hiam? Ko adingin na khatpeuh la ka hi uh hiam?” ci-in a dawng uh hi.

43 Tua ciangin Israel mite in Judah mite kiangah, “Kumpipa ah tanh sawm ka nei uh hi. Tua banah David pen no sangin ko tawh ka kisai zaw uh hi. Tua hi napi bang hangin hong simmawh na hi uh hiam? Kumpipa lak kik ding a sawm masa ko hi lo ka hi uh hiam?” ci-in a dawng uh hi.

Ahi hangin Israel mite sangin Judah mite a paukhauh zaw uh hi.